पारसलाई हेटौंडामा रेड कार्पेटले स्वागत गरियो

पूर्व उपप्रधानमन्त्री एवं परराष्ट्रमन्त्री सुजाता कोइरालाका ज्वाइँ रुबेल चौधरीमाथि गोली चलाएको आरोपमा तारेख धाउन चितवन आएका पूवर् युवराज पारसलाई गएको बिहीबार हेटौंडामा रेड कार्पेटले स्वागत गरियो । रेडकार्पेटमा पारसलाई हिँडाउने काम राष्ट्रवाद संघ, मकवानपुरले गरेको  थियो ।दिउँसो करिब साढे १२ बजे पारस आउने भन्दै तामझामसहित भव्य तयारी गरिए पनि उनलाई हेर्न लामबद्ध हुनेहरू साँझ ५ बजेसम्म कुर्न बाध्य भए ।  साँझ ५ बजेर केही मिनेट गएपछि करिब ५० वटा मोटरसाइकलसहितको प्रहरी स्कर्टिङमा दर्जनभन्दा बढी कार पछाडि लगाउँदै पारस हेटौंडा आइपुगे ।  बा. ५ च ८९७९ नम्बरको पहेलो ल्यान्डरोबर... 


कार आफंैले हाँकेर आएका पारसलाई हेटौंडा, नवलपुरमा भव्य स्वागत गरिएको थियो ।

आयोजकहरूले करिब १ सय मिटर रातो कार्पेट ओछ्याएर पारसको स्वागतको प्रबन्ध गरेका थिए । स्टेजमा आयोजकले राखिदिएको भव्य कुर्सीमा पारस  बसे र मुसुमुसु हाँस्दै आफ्ना समर्थकलाई अभिवादन फर्काए । 

खैरो टोपीले आफ्नो कालो लामो केश छोपेर आएका पारसले पुरानो देखिने पहेंलो गन्जीबाहिर खैरो ज्याकेट र पुरानोझैं लाग्ने नीलो पाइन्ट लगाएका  थिए । उनले हिँड्न सजिलो हुने खालको खैरो जुत्ता लगाएका थिए ।

पारसलाई सबैभन्दा पहिले वृद्धवृद्धाले भेटे । पारससँगको भेटका क्रममा एक वृद्धले यस्तो टुक्का सुनाइन्-

हातखुट्टा ओइलाए घामले

बल्ला दर्शन दिनुभो रामले ।

वृद्ध महिलाले त्यसो भन्दा फ्रेन्चकट दाह्रीमा सजिएका पारस मुसुक्क हाँसे मात्र । आफूलाई फूल दिएर स्वागत गर्ने युवतीहरूलाई उनले 'थ्यांक यू भन्दै  अंग्रेजीमा धन्यवाद दिए भने अधिकांश युवासँग हात मिलाए । आफूलाई भेट्न र हेर्न आएका मानिसहरूको भीड देखेर उनी आफ्ना छेवैका सहयोगीसँग  कानेखुसी गर्दै 'कति धेरै मान्छे ? भन्दै मख्ख परे । उनले घाँटीमा चाँदीको मोटो सिक्री लगाएका थिए भने हातमा रुद्राक्ष र पत्थरजडित बाला लगाएका  थिए । पारसले हातमा फिक्का पहंेलो रंगको घडी बाँधेका थिए । भेटका क्रममा पहेंलो वस्त्र लगाएका एक जोगीले दिएको पत्थर उनले खुसुक्क खल्तीमा  हाले । जोगीले केही फूलसहित पारसको हातमा उक्त वस्तु राखिदिएका थिए । पारसले पनि उक्त वस्तुलाई नहेरीकनै खल्तीमा राखे ।

समर्थकलाई भेट्ने क्रममा पारसले करिब ६ बजेतिर आयोजकले व्यवस्था गरेको खाना खाएका थिए । एक सहयोगीले उनको हातमा एक गिलास को काकोला थमाइदिएपछि उनले स्टलमा रहेका युवतीहरूतर्फ हेरी मुसुक्क हाँस्दै मुन्टो हल्लाएर 'थ्यांक यू' भने । 

्साँझ करिब सात बजेतिर पारस आफ्ना सहयोगीहरूसहित त्रिभुवन राजपथको बाटो हुँदै काठमाडौंतर्फ लागे । उनले उपस्थित सञ्चारकर्मीहरूसँग केही  बोल्न चाहेनन् । उनलाई नेपाल प्रहरी तथा सशस्त्र प्रहरीले संयुक्त रूपमा स्कर्टिङ गरेका थिए । स्रोत: साप्ताहिक